"Anaka, arovy ny tenanareo amin'ny sampy". — 1 Jaona 5:21
Genesisy 35: 2. Dia hoy Jakoba tamin'izay tao an-tranony mbamin'izay rehetra nomba azy: Ario ireo andriamani-kafa, izay ao aminareo, dia madiova, sady ovay ny fitafianareo.
Ny fanompoan-tsampy dia fanompoana andriamani-kafa. Tsy avelan'Andriamanitra ho tononina akory na dia ny anaran'ireo andriamanitra sampy aza.
Eksodosy 23: 13. Ary tandremo izay rehetra nolazaiko taminareo, ka aza manonona ny anaran'andriamani-kafa akory ianareo; aza avela ho re avy amin'ny vavanao izany.
Mandidy ny olony Andriamanitra mba tsy hiankohoka eo anatrehan'ny andriamani-kafa.
Eksodosy 34: 14. Fa tsy hiankohoka eo anatrehan'izay andriamani-kafa ianao; fa Jehovah, dia saro-piaro no anarany, satria Andriamanitra saro-piaro Izy.Izay rehetra manompo sampy dia hiharan'ny fahatezeran'Andriamanitra ary haringany tokoa.
2 Mpanjaka 22: 17. Satria nahafoy Ahy izy ary nandoro ditin-kazo manitra tamin'izay andriamani-kafa ka nampahatezitra Ahy amin'izay rehetra nataon'ny tànany, dia mirehitra amin'ity tanàna ity ny fahatezerako ka tsy hosakanana.Misy olona maro izay tsy mety manompo an'Andriamanitra, Izay namoronana ny tany sy ny lanitra sy ny ranomasina ary izay rehetra eo aminy. Miankohoka eo anoloan'ny bibi-dia sy ilay dragona ireo.
Apokalypsy 13: 4. Ary dia niankohoka teo anoloan'ilay dragona ireo, satria izy no nanome ny fahefana ho an'ny bibi-dia; ary niankohoka teo anoloan'ny bibi-dia koa ireo ka nanao hoe: Iza no tahaka ny bibi-dia? ary iza no mahay miady aminy?
Ireo izay manompo andriamani-kafa dia hiharan'ny fahatezeran'Andriamanitra sy ny fandringanana rehefa tonga ny fotoam-pitsarana.
Apokalypsy 16: 2. Ary ny voalohany nandeha, dia nampidina ny tao an-doviany tamin'ny tany; dia nisy vay ratsy sady mampahory tamin'ny olona izay nanana ny mariky ny bibi-dia sy niankohoka teo anatrehan'ny sariny.Ireo izay nanompo andriamani-kafa sy nanaiky an-tsitrapo ny hiankohoka eo anatrehan'ny bibi-dia sy ny sariny, dia tsy hahazo ny famindram-pon'Andriamanitra, ary hanana ny anjarany amin'ny fahafatesana faharoa.
Izay tsy mba niankohoka teo anatrehan'ireo bibi-dia handray ny valisoa fiainana mandrakizay, ary hiara-manjaka amin'i Jesosy Kristy ireo.
Apokalypsy 20: 4. Ary nahita seza fiandrianana maro aho, ary nisy nipetraka teo amboniny, ary nomena fahefana hitsara izy; ary hitako koa ny fanahin'izay notapahin-doha noho ny filazana an'i Jesosy sy ny tenin'Andriamanitra sy izay rehetra tsy niankohoka teo anoloan'ny bibi-dia na teo anoloan'ny sariny ary tsy nandray ny marika ho eo amin'ny handriny na ho eo amin'ny tànany; ary velona izy ka niara-nanjaka tamin'i Kristy arivo taona.